Íþróttir og útivist
Hlaupandi um verslunarmannahelgina
Hlaupasería Súlur Vertical býður upp á stórbrotna upplifun fyrir hlaupara og áhugafólk um óspillta náttúru og fagurt umhverfi. Hlaupin verða haldin dagana 31. júlí - 1. ágúst og spanna allt frá Krakkahlaupi í Kjarnaskógi, 19 km hlaupi á stígum í bæjarlandinu og upp í 100 km hlaup sem hefst hjá Goðafossi. 100 kílómetra hlaupið er nú haldið í fjórða skipti og hefur mikið verið lagt uppúr hlaupaleiðinni.
Allt um hlaupin á heimasíðu hlaupsins.
Gangandi um verslunarmannahelgina
Akureyri er perla göngugarpans. Það er ótrúlega auðvelt að reima á sig skóna og leggja af stað, leiðirnar eru margar og eitthvað fyrir alla. Viltu ganga og skoða menningarminjar? Falleg hús? Falleg tré eða rjúka upp hæðarmetra og viðra fyrir þér undurfagra Eyjafjörðinn og meira til?
Hjólandi um verslunarmannahelgina
Tókstu hjólið með norður? Yndislegt! Þá ertu á réttum stað, hvort heldur malbikið heilli eða grófir utanvegastígar með bröttum brekkum. Það er frábært að hjóla um bæinn, koma jafnvel við í ísbúð eða leggjast í grasbala með strá í munninum. Svo eru hamrar, dalir, fjöll og firnindi sem bíða í næsta nágrenni.
Vissir þú að lyfturnar í Hlíðarfjalli eru líka opnar á sumrin? ...hóhóhó gleðilegt sumar - brunaðu upp í fjall (alla leið á toppinn?) og svo alla leið niður. Beint í sund jafnvel? Upplýsingar um opnunartíma svæðisins er á heimasíðu Hlíðarfjalls.
Syndandi um verslunarmannahelgina
Elskaru sund? Þá er heppnin með þér. Það eru fjórar sundlaugar á Akureyri(!) Sundlaug Akureyrar, Glerárlaug, Sundlaugin í Hrísey og Sundlaugin í Grímsey. Við mælum með þeim öllum! Allt um opnunartíma og aðrar upplýsingar á https://sundlaugar.is/
Skyndipróf: Hvað eru margar almenningssundlaugar í Eyjafirði? Vísbending..eflaust fleiri en þig grunar.
Keyrandi um verslunarmannahelgina
Bílaklúbbur Akureyrar heldur utan um tvær keppnir um verslunarmannahelgina sem bílaáhugafólk má ekki missa af! Að auki verður fornbílasýning á Skógardeginum í Kjarnaskógi sunnudaginn 2. ágúst kl 13-16. Nóg um að vera og allt um málið á Facebook síðu Bílaklúbbs Akureyrar.
Svo bara að muna að anda og njóta - ekki þjóta!